Kati
3

Whakatupuranga 3

Te Tupuranga Whakaaro Rorohiko

He Whakamārama

Ka mārama ki tēnei mea te hātepe, ki te rerekētanga i waenga i te hātepe me te papatono, ā, ka neke atu i te kotahi te hātepe ka taea mō te hopanga kotahi. Ka taea te whakaraupapa hopanga ki ngā tohutohu māmā ki te hanga hātepe mō te papatono rorohiko, ka whakamahi i ngā whakaaro raupapa ki te matapaki i te whanonga o ēnei papatono. Ka taea te whakahiato, te patuiro hoki i ngā papatono e whakamahi ana i ngā tāuru, i ngā tāputa me ngā raupapanga me ngā koromeke. Kua mārama hoki e rua ngā āhuatanga mō te pupuri raraunga, ko ngā mati tāhūrua ēnei (ngā moka).

Horopaki

Ka tūhuratia e ngā ākonga te tikanga o te manaaki tangata i te wā o te aituā ā-taiao i tō rātou hapori. Nā te ohorere o te aituā, tokomaha ngā whānau e toro atu ana ki te marae hei wāhi noho.

Ngā putanga ako

Ka taea e te ākonga:

  • te whakamahi i tētahi papatono, pēnā i a Scratch, ki te hanga hātepe mō tētahi papatono rorohiko hei whakamōhio i te whānau ki te ara tōtika, ki te ara mōrearea kore ki te marae
  • te matapae i te whanonga o te papatono e ai ki te hātepe i hangaia e rātou
  • te patuiro (arā, te rapu hapa me te whakatika) i ngā papatono māmā e whakamahi ana i ngā tikanga tāuru, tāputa, raupapa, koromeke hoki
  • te whakamārama ki te whānau i te ara ki te marae, ki ngā tikanga huhua hoki (Tīemiemi, Tīhau, Pukamata, Tiriata, Atapaki, te mea, te mea.)

Hononga ki ētahi atu Wāhanga Ako

Pāngarau: Te Wāhi, te Ahunga me te Panoni (Te ahunga me ngā koki)

Te Reo Matatini: Kia mārama pai te ākonga ki te whakaraupapa i tētahi tukanga. Te āta wetewete i tētahi ara me ngā momo wāhi ka taea. Te whakawhiti kōrero ki ōna hoa me te take i pērā ai te whai i te mahere. Kia mārama pai ai te ākonga ki te pānui i ngā mahere kua whakaritea.

Te ngohe

Tūmahi

Kia whakaaro nui ngā ākonga ki ngā hiahia ake o te whānau e pā ana ki - te wāhi noho, te kai, ngā kākahu, te whakapā atu ki ngā whānau, te mea, te mea. Me tae wawe atu, me tae ora atu ngā whānau.

Me tuku tohutohu māmā, tohutohu mārama kia tae ki te marae. Nā te kino o te aituā nei, kua aukati ētahi o ngā huarahi, ā, e ahu mai ana ngā whānau i ngā tōpito maha o te hapori.

Ko tā te ākonga:

  • he whakamahere, he hanga i ētahi tohutohu māmā hei whakamārama i te ara tōtika, i te ara haumaru ki te marae
  • he whakamātau i taua ara, i ō tohutohu mō ngā hapa me te whakatika i tāu i kite ai
  • he whakamahere i tētahi ara kē mō te tūpono he taupā e aukati ana i te huarahi, nā te aituā ā-taiao
  • he whakamahi taupānga, pērā i a Scratch, ki te panoni i ngā tohutohu hei hātepe
  • he hanga kiriata poto e whakaatu ana ki ngā whanau i te ara tōtika, te ara tuarua hoki 
  • he tuari i ngā kiriata i hangaia e koe ki ngā whānau e hiahiatia ana mā te whakairi ki tētahi wāhi kia māmā te tiki atu, pēnei i te paetukutuku, te whārangi Pukamata rānei.

Ngā mōhiotanga

E mārama ana te ākonga:

  • ko ngā hātepe he kohinga tohutohu māmā, e āta rārangihia ana hei whakaoti hopanga, ā, hei tuhi papatono rorohiko hoki
  • e tika ai te mahi o tētahi papatono rorohiko, me tika, me mārama ngā hātepe (tohutohu) hei whai
  • ahakoa te rerekē o ētahi o ngā hātepe, ka taea tonu ngā putanga ōrite i te papatono rorohiko
  • ko tētahi o ngā reo o te papatono rorohiko e whāia ana, arā, ko te waehere tāhūrua, ā, e 2 noa iho ana tau, ko te 0 me te 1.
  • ki te waehere tāhūrua, ko te raupapa me te auau o te 0 me te 1, e tohu ana i ngā hātepe rerekē.

Ngā Pātai:

Ka pēhea te matapae i ngā putanga o āu hātepe?

Ka pēhea pea ngā hātepe rerekē e puta mai ai hei huanga kotahi i tētahi papatono rorohiko?

Ka pēhea tō whakatau ko tēhea te hātepe pai ake hei whakamahi?

Hei tāpiri ki te whānau, ko wai atu hei tono i te tauira o te papatono i hangaia e koe?

Ngā pātai

Te Whakarite i te Wharenui hei wāhi moe

Ka pēhea te whakatakoto moenga ki te wharenui kia āta whakamahia te rahinga o te papa me te pai o te noho o te tokomaha?

Ka pēhea te whakarite i ngā ara mō ngā manuhiri kia haumaru te haere ki te wharepaku me ngā putanga?
He take hei whai i tētahi tauira me tētahi raupapa?

Ka pēhea te tautohu hapa i te tauira/raupapa o ngā moenga?

Te Hora Tēpu

He aha ngā utauta mō te tēpu?

He aha ngā momo utauta mā ngā tāngata tonu hei hari ki te tēpu?

Ka pēhea te whakarite i ngā horanga o ia tēpu kia ōrite ai te katoa?

Ka pēhea te tautohu hapa i te tauira/raupapa o ngā horanga tēpu?

Hei anga whakamua

I ngā hātepe kua oti i ngā ākonga te hanga hei taupānga, hei papatono, pēnei i te SCRATCH, he whakamahi ki taupānga anō. E ōrite ana ngā putanga? Me matapaki ngā ākonga i tā rātou whakahiato, patuiro i ō rātou hātepe e pai ake ai mō taupānga kē.

Ka whakamahia ana te hātepe, ka hanga kiriata anō e whakaatu ana i te ara tōtika, i te ara haumaru ki te marae me ētahi atu ratonga whakaora, arā, te Hōhipera, te Teihana Peiāhara, te mea, te mea.

Ekea

Ka whakamahia e ēnei ākonga tētahi karetao (Dash) me tana taupānga: (Wonder Dash):

  1. Ki te hanga mahere tukutuku
  2. Ki ngā waehere i tuhia ai e rātou he tohutohu māmā (ngā hātepe me ngā whakahiatotanga) mō ngā karetao kia neke i te pito A ki te marae.
  3. Hei whakamātau i ngā tohutohu, hei tautohu, hei whakatika i ngā hapa (patuiro)
  4. Ki te tuhi tohutohu mō tētahi ākonga hei whai, hei whakamātau ki te karetao.

Kupu hou

aituā ā-taiao – natural disaster

hātepe – algorithm (he tukanga tohutohu ki te

whakaoti hopanga)

karetao – robot

koromeke – loop

mati tāhūrua – binary digits

moka – bit

papatono – program

patuiro – debugging

tāhūrua – binary

tāputa - output

taupānga – application (app)

tāuru - input

waehere tāhūrua - binary code

whakaoti hopanga – problem solve

He Taunaki mahi

Whakaaro Hātepe