Kati

He aha te Hangarau Matihiko?

Te Whānau Hangarau Matihiko

Video Transcript
Manaaki – Kia ora e hoa (e hīkoi haere mai ana)

Kaitiaki Tūī – Kia ora Manaaki. Kei te pēhea te haere a te tarakihana matatopa?

Manaaki – Tino pai. I whakamātauhia e au ki te pātiki pātohe i muri rā, ana i pai. Nā, kua whakamahia ināianei ki te parau i tēnei pātiki kia pai ai te whakatō i ngā kai mō te takurua. Ka eke ki te wā ka riro mā Tama te pāmu e whakahaere, e hia kē ngā mea ka whakaaunoahia kia māmā ake ai ki a ia. ME TE AHA, kua kore e mate taku tuarā i ngā mahi uaua i runga i te pāmu pērā i te pāpā o Atawhai.

Kaitiaki Tūī – Āna e hoa, kei te mate te tuarā o Te Miri ināianei. I te kōrero ahau ki a Kiri rāua ko Te Miri i tētahi rangi nei mō te marautanga Hangarau Matihiko hou. E rua ngā pou tarāwaho marautanga, ko te whakaaro rorohiko, e hāngai ana tēnei ki te āhua o tō tuhi i tō papatono mō te tarakihana matatopa, ā, me te pou tarāwaho tuarua ko te hoahoa me te waihanga i ngā putanga matihiko ka tuhia hei whakarite ko ngā rongoā matihiko ka hangaia e mātau hei āwhina i tō tātau iwi me te taiao.

Manaaki – Koinā, ka āwhina tēnei matatopa i ahau ināianei, me Tama hoki ina tukuna te pāmu ki a ia. I te kōrero mai a Kōhine mō tēnei marautanga hou i tērā atu rangi. Te āhua nei ka puta i te Hangarau Matihiko ngā whai wāhitanga akoranga mō ā tātau tamariki ka whai hua mō te rapa rongoā mō ngā raruraru mahi o tēnei rā. He mea nui te mōhio ki te whakaaro pēnei. Ki ahau nei ehara mō te waihanga papatono mō ngā rorohiko anake.

Kaitiaki T – Ehara. I kī mai a Kiri he momo whakaaro tēnei e whaikiko ana mō te rapa i ngā rongoā mō ngā momo raruraru katoa.

Kaitiaki T – (ka tiro atu ki muri i a ia) Kei te waiho noa e koe te tarakihana ki konā kia mahi haere noa?

Manaaki – Āe, koinā tonu te āhua o te tarakihana matatopa. Ka taea e au te haere ki te mahi i tētahi atu mahi, pērā i te heri i a Kere ki te kōhanga reo.

Kaitiaki T – Engari he mea hou tēnei, ka aha mēnā ka hē?

Manaaki – (ka titiro anō ki te tarakihana) Engari kei te pai te mahi, arā. Heoi, ka taea e au te tirotiro kei te pēhea i runga i taku taupānga, anei te matapihi paku nei kei te tūhono ki te kāmera i roto i te tarakihana.

Kaitiaki T – Ū, kei te māharahara tonu ahau Manaaki. Kei raruraru noa iho.

Manaaki – Kei te pai noa iho. Ka kite anō i a koe.

Kaitiaki Tūī – Ka pai kua tae mai koe Manaaki i te mea kua raru te tarakihana.

Manaaki – Nē? Kei hea?

Kaitiaki Tūī – Kei te hekenga atu rā i te kokonga i te wāhi ka whakamutua e koe te parau i tēnei pātiki.

Manaaki – Aiiii! (kua puku tōna i te mea i pēhia e ia te pātene whakamutu i te taupānga). I wareware i ahau te tairua rā Tūī, koirā te wāhi me kūpeke haere te tarakihana me te neke whakamua kia kore ai e raru atu i te hekenga.Te āhua nei kāore i oti i ahau te tukanga ā-rorohiko ki tōna mutunga.

Kaitiaki Tūī – Hmmm… he māmā noa iho te whakatika i te…ai, i roto tonu pea tērā i te whakamātautau i te taiepa o muri… kāore pea i nui rawa.

Manaaki – Hmmm. Ko taku whakapae kua karia mai he rua nui tonu.

Manaaki – Atā! I te tika tonu koe, ko te tikanga me mōhio ahau. Ina hangaia e au he papatono rorohiko mō tētahi atu kaupapa ka whakamātauhia e au i tētahi wāhi pai, ka whakamātauhia anō e au i tētahi taiao tūturu engari kāore āu mahi pērā mō tēnei. Ehara tēnei i te mea pai mō te taiao i tēnei rā. Atā! Ka roa tonu taku kari mai i tēnei. Te āhua nei ka rite taku hīkoi ki a Te Miri i tēnei pō.
He aha te Hangarau Matihiko? video transcript

Te Whānau Hangarau Matihiko

  • Te-Whanau-Hangarau-Matihiko-Video-Transcript.pdf
  • 106 KB