Kati

Te whakarewanga o ngā rauemi ā TupuOra

Par 12 Hakihea 19

Mā ngā rauemi reo Māori, rauemi matihiko hou e kitea ai ngā hītori o Aotearoa

Kua whakamahia ngā hangarau matihiko hou, arā, te ao whakarei ā-māriko (AR) hei whakaora mai i te pakanga o Ōrākau, me tētahi mahere pāhekoheko o ngā pā tipuna o Te Atiawa.

Ko ngā rauemi nei ko ētahi noa iho o ngā rauemi hou i whakawhanakehia i raro i te kaupapa o te Te Aho Ngārahu, ko tētahi kaupapa tēnei e pai ake ai te whai wāhi ki ngā rauemi e hāngai ana ki te marau ā-kura, ā-iwi rānei.

Hei tā Kiritina Johnstone Kaiwhakahaere Matua o Te Uepū Reo Māori, mā ēnei rauemi hou rauemi matihiko reo Māori nei, kua eke tātou ki taumata kē mō te wāhi ki te waihanga rauemi marautanga. “Inā kē te hohoro o te tipu haere o te taiao reo Māori me ōna anō whakaakoranga, nō reira he wāhi nui tō ngā rauemi hou nei ki taua taiao.”

He mea waihanga ēnei rauemi hou e te kamupene o TupuOra, i te taha o ngā kaituhi mai i tēnā rohe, i tēnā iwi nō reira ngā kōrero me te moemoeā mō ia rauemi.

E ai ki Kingi Kiriona, te Pou Whakahaere o TupuOra, Kingi Kiriona, “mō ētahi o ngā rauemi nei, e rua tau te roa o te wā e whanake mai ana. Nā konei he kaupapa nui whakahirahira te whakarewatanga ā te Wenerei, me te aha, ka whakamihia ngā kaituhi anō me ō rātou whānau mō rātou i whakaae mai ki tēnei huarahi e puta ai ā rātou kōrero ki te ao.”

I whakarewatia ngā rauemi nei i Kirikiriroa i te Wenerei, 27 Whiringa-ā-rangi 2019.

Ko ētahi atu o ngā rauemi i whakarewatia i taua rā, ko tētahi kēmupapa e whai haere ana i te ara heke mai o Tamatea Arikinui mā Rarotonga kia tae mai ia Aotearoa. Arā hoki ētahi pukapuka matihiko mō ngā tuahangata Māori mō Pūwhaorangi o Te Arawa, me Ngarue o Taranaki.

Neke atu i te 20 ataata tuihono me ngā pukapuka anō kua oti hei wāhanga mō tēnei huinga rauemi hou, ā, ka tukuatu ki Kauwhata Reo. Koia te papa tuihono hou hei āwhina i te hunga e ako ana mā te reo te reo Māori. E wātea mai ana ēnei rauemi kia tirohia i www.kauwhatareo.govt.nz.

“Inā hoki te pai o te kaupapa o Te Aho Ngārahu e mahi ngātahi ai ki a ngāi Māori ki te waihanga rauemi hou, ā, ko tāku ki ngā kura, ngā kura kōhungahunga me ngā kōhanga reo, kia kaha te whakamahi i ngā rauemi hei hāpai i te marau ā-kura,” hei tā Kiritina.

Ka tuwhera mai anō ngā tono mō Te Aho Ngārahu i te wā o Pūanga/Matariki 2020.

Mō ētahi atu kōrero mō Te Aho Ngārahu go here.

Kia tirohia ngā kōrero mō ngā rauemi kua oti kē te waihanga go here.

Mō ngā pātai pāpāho whakapā atu ki media@education.govt.nz

 

Waterways
Kau Kawana
He Whetu
Te Hapuku
Puhaorangi
Ngati Ranginui
Books
TupuOra
 Hihiri Ake
NR
TeAtiawa
 TeAhoNgarahu hero