Kati
Ko te whaitake o te kōwhiringa raraunga

Ko te whaitake o te kōwhiringa raraunga

Tirohanga Whānui

Ko te whaitake o te kōwhiringa raraunga

Ka matua mohio kare tonu e taea te whakatika i nga raru ā-rorohiko katoa mā te hātepe, ā, he uaua hoki ētahi (kāore he pūrere kia hangaia ki te whakamahi i tēnei tū momo hātepe), ā, kia tīkina atu he momo otinga, arā, ko te otinga Heuristic (Pokotata Whakaaro) tēnei. Ka whakawhitiwhiti kōrero hoki mō te tohutohu anga raraunga me te arotake i te whakamahinga o aua raraunga i roto i te āhuatanga o te tuaritanga i waenga i whakaritenga mahi, i ngā whakaritenga pupuri hoki, me ngā pānga ki ngā momo hātepe katoa. Ka whakamahia hoki te tukanga tukurua ki te hoahoa, ki te whakahiato, ki te tuhi me te whakamātautau i tētahi papatono rorohiko matatini.

Ngā putanga ako

E ako ana ngā ākonga ki:

  • Te wehewehe i ngā momo hanganga raraunga rerekē.
  • Te aromātai i te tōtika o ngā hanganga raraunga.
  • Te tautohu i te hanganga raraunga tino tōtika rawa mō tētahi pūtake.

Ngā mōhiotanga

E mōhio ana ngā ākonga:

  • Ka taea ngā raraunga te rokiroki ki ngā hanganga rerekē.
  • He tauira ngā Rārangi e Honoa ana, ngā Putunga, ngā Rākau Raraunga me ngā Kauwhata o ngā momo hanganga raraunga rerekē.
  • Kei te āhua o te hanga te huarahi e tīkina ai, e tāpiritia ai, e tangohia ai hoki he raraunga i tētahi kohinga.
  • Ka hangaia ētahi hanganga raraunga mō ngā pūtake tōtika (Hei tauira, he tōtika ake te Tūtohi Tukutuku mō te tiki raraunga i tētahi kuputohu e mōhiotia ana. He tōtika ake ngā Rārangi e Honoa ana mo tē tāpiri me te tango rauranga mai i mua).
  • Ka hangaia, ka hangaia anō rānei ētahi hanganga raraunga i ētahi atu hanganga raraunga ko te māmā o te whakamahitanga te pūtake (Hei tauira, ka taea ngā Putanga te whakatinana mā te whakamahi i te tūtohu tukutuku, te rārangi e honoa ana rānei.

Horopaki

Kua tūpono mai he parekura taiao me te aha kua peia atu ngā tāngata o te hapori. E whakarato ana ngā marae katoa o te takiwā i te wāhi noho me te rārangi o ngā tāngata e noho ana i tēnā marae, i tēnā marae. E tūhurahura ana, e matapaki ana, e aromātai ana ngā ākonga i te ara tino pai rawa mō te kohikohi, rokiroki me te whakaraupapa i ngā kōrero whaiaro o ērā kua tae ki tēnā marae, ki tēnā marae, kia mōhio ai ngā whānau e haumaru ana aua tāngata, ā, e noho ana rātou i hea.

 

Rauemi

Ngā Hanganga Raraunga

Horopaki:
He parekura taiao

 

Tā mātou mahere mō te kohikohi, te rokiroki me te whakaraupapa raraunga i tētahi parekura taiao.

Kua tūpono mai he parekura taiao me te aha kua peia atu ngā tāngata o te hapori. E whakarato ana ngā marae katoa o te takiwā i te wāhi noho me te rārangi o ngā tāngata e noho ana i tēnā marae, i tēnā marae. Kua tonoa mātou ki te rūhurahura, te matapaki, me te aromātai i te ara tino pai rawa mō te kohikohi, rokiroki me te whakaraupapa i ngā raraunga o ērā kua tae ki tēnā marae, ki tēnā marae.

Te Rapanga:

HMC1803 CORE 7A 1

Kua whakatauria e mātou te whakamahi i tētahi rārangi ki te whakaatu i te raupapa o te taenga o tēnā, o tēnā ki ō mātou marae. Ka taea tētahi rārangi te whakamahi mēnā ka hiahia ki te whakaraupapa raraunga e ai ki tētahi raupapa ake, ki te tango me te tāpiri raraunga i tētahi wāhi noa i te rārangi.

Otinga: Rārangi

HMC1803 CORE 7A 2

Ko ērā atu hanga raraunga i whai whakaarohia e mātou ko:

  • te huinga: ka taea tēnei te whakamahi ki te whakaatu i ngā raraunga i roto i tētahi kohinga kore ai e hira te whakaraupapa, tē taea hoki te tukurua
  • te tūtira: e hira ai te whakaraupapa, engari ka taea te tāpiri me te tango mai i ngā pito tauaro anake
  • me te putunga: e hira ai hoki te whakaraupapa, engari ka oti te tango me te tāpiri i te pito ōrite.

Ahakoa e pai ana te huinga hei whakamōhio mai ko wai mā kua tae ki tēnā marae, kī tēnā marae, kua whakatau mātou ki te whakamahi i te rārangi nā te mea ka whakaatu i te raupapa e tae ai tēnā mw rēnā ki ngā marae. Ka taea hoki te whakamahi i te tūtira, te putunga rānei ki te tautiaki i te raupapa i tae ai tēnā me tēnā ki ngā marae, engari mā te rārangi ka taea e mātou te taki atu i ngā tāngata ahakoa he aha te raupapa. Nō reira, e whakapono ana mātou he otinga pai te rārangi mō to kohikohi, rokiroki me te whakaraupapa i ngā raraunga o ērā kua tae ki tēnā marae, ki tēnā marae.

Ngā Kupu Hou / New Words
Kupu Māori
Kupu Pākehā

Hanganga Raraunga

Data Structure

Tōtika

Efficiency

Pūtake

Purpose

Tūtohi Tukutuku

Array

Whakaaro Pokotata

Heuristic