Kati
Te taki anō i ō tātou kōrero

Te taki anō i ō tātou kōrero

Tūmahi

Whāinga
  • Āta mahi mā tētahi tukanga whitiauau kia hua mai he otinga matihiko mō tētahi kiritaki.
  • Whai māramatanga ki ngā whakahīrautanga ki tana otinga, ki ngā tikanga Māori hoki.
Putanga ako
Ka taea e te ākonga
  • Matapaki i ngā āhuatanga e pā ana ki te otinga kua tautuhia e ia me tōna pāpā torohū ki te tikanga Māori.
  • Whakahoahoa i tētahi otinga matihiko mō tētahi whāinga i tautuhia.
Paearu angitu
Ka angitu te ākonga mēnā ka taea e ia
  • Tautuhi i ngā āhuatanga e tika ana e pā ana ki te otinga i tautuhia e ia me tōna pāpā torohū ki te tikanga Māori.
  • Whakawhanake i tētahi otinga matihiko ki te āhua whitiauau e tūtuki ai ngā hiahia o te kiritaki.
Te Ngohe

Ko tā ngā ākonga:

  • He matapaki i te ihirangi o ngā tānga ā-pepa e toe tonu ana me ngā ihirangi mō ngā rā e tū mai nei i te taha o te māngai nō te rūnanga.
  • Me matapaki hoki i ngā reo ake o te iwi, me whiriwhiri tāngata anō hei taki i te kōrero.
  • Tirohia tētahi putanga matihiko hei whakawhanake, hei whakaputa, ka whakaputu kōrero ki te ipurangi. Rangahaua ētahi atu pūmanawa rorohiko, ētahi atu paetukutuku hoki ki te kimi mātau ki ngā momo kōwhiringa hoahoa tae atu ki ngā momo mahinga, otirā te āhuatanga tika ā-karu, ā-ngākau hoki.
  • Whakawhanaketia tētahi mahere hei whakahaere i te ihirangi (he tuhinga, he whakaahua, he ataata, he kōnae ororongo, he tākinga kōrero) me te kauneke o te kaupapa.
  • Rangahaua ngā kōwhiringa hoahoa ina koa Te SilverStripe, CSS, JavaScript.
  • Whakaaturia kia rua ngā kōwhiringa hoahoa ki te māngai nō te rūnanga ki te whakatau i te hoahoa whakamutunga.
  • Tiki ihirangi i te rūnanga ka tuku urunga ki te rūnanga ki te whakamātau, te whakawā me te whakahoki kōrero e pā ana ki te otinga.
  • Ka whitiauau te āhua o ngā whakarerekētanga hoki atu, hoki atu kia eke rā anō te otinga matihiko ki ngā hiahia.
  • Whakatakotoria te otinga whakamutunga ki mua i te aroaro o ngā kaimahi o te rūnanga.
Ngā whakaritenga

(Tuhia te whāinga me ngā paearu angitu ki te papa i mua i te tīmatanga o te wāhanga).

Tīmatanga

Te whakatakoto i te whāinga me te matapaki i te tūmahi. Kōrerohia ngā paearu angitu.

Whakaaturia te tono ki te karaehe.
  • Whakamāramatia te tūmahi. Me hoahoa te otinga matihiko e āhei ai te rūnanga o te rohe ki te whakawhanake me te whakaputa ā-hiko i ā rātou kōrero (hei tauira ngā ī-pukapuka). Hoahoatia me te whakawhanake i tā rātou otinga. Whakaaturia tā rātou otinga ki te akomanga.
Te Puku

Me matapaki ā-rōpū ka whakarite i te whāinga me ngā momo kaiwhakamahi mō te otinga matihiko.

Waihangatia ngā whakaaro hoahoa hei whakatutuki i ngā hiahia o ngā kiritaki,

Whakaritea ngā pātai mō te kiritaki e tika ana kia kōrerohia tonutia tae atu ki te momo ihirangi ka raua atu ai ki te otinga matihiko. Kōrerohia ēnei ki te kiritaki i ngā wā e tika ana.

Tīpakona tētahi hoahoa ka whakamārama i te hāngai o te hoahoa ki te kaiako. Rangahaua ngā otinga matihiko hei aratohu ki te whakawhanake i tō otinga ina hiahiatia. Matapakina ngā momo mōhiohio ka whakaaturia e te hoahoa e wātea ana rānei ki te hoahoa.

Matapakina ngā whakahīrautanga e tika ana kia whakaarohia me tō otinga matihiko, hei tauira ā-pāpori, ā-ahurea, ā-ture, ā-matatika, ā-motika whakairoiro hinengaro, ā-matatapu, ā-āheitanga, ā-whakamahi, ā-mahinga, ā-rerehua, ā-whakaaro ki te momo kaiwhakamahi, ā-hauora me te haumaru. Pānuihia, matapakihia ngā ariā matua i te pito kōrero Digitisation and Mātauranga Māori (kei te hononga i ngā Rauemi).

Whakawhanaketia te mahere mō te kaupapa ka tīpako i tētahi utauta hei āwhina ki te whakahaere me te aroturuki kaunekehanga, hei tauira ko te Trello. Me tuku āheinga ki te kiritaki kia pai ai tana tuku urupare i te roanga atu o te hātepe.

Whakawhanaketia te otinga matihiko ka tuku āheinga ki te kiritaki hei whakamātautau māna i te roanga atu o te hātepe hei kohikohi urupare me te mātua whakarite e tutuki ana ngā hiahia e tika ana. Mahia ngā whakarerekētanga e hiahiatia ana

Kia mutu rā anō te hanga, ka utaina katoatia hoki ngā ihirangi, whakaaturia te otinga ki te akomanga/kiritaki.

I roto i te whakaaturanga ka whakamārama ngā ākonga i pēhea i tutuki ai i tā rātou hoahoa ngā whakahīrautanga e tika ana me ngā hiahia o te kiritaki.

Whakamutunga

Hoki atu ki ngā whāinga me ngā paearu angitu Whakaputaina ngā whakaaro whakamutunga mō te hātepe me ngā mahi i mahia.

 

He taunaki mahi

Tā te ākonga

HMC1803 VUW 4A 1

Whakaahua 1: Te āta tirotiro i ngā otinga hoahoa matihiko.

 

HMC1803 VUW 4A 2

Whakaahua 2: Te matapaki i ngā āhuatanga ahurea e pā ana ki te otinga hoahoa matihiko.

 

HMC1803 VUW 4A 3

Whakaahua 3: Te atahanga papamuri o te tūmau ipurangi.

 

HMC1803 VUW 4A 4

Whakaahua 4: Te tāpiri ihirangi ki te tūmau ipurangi (kuputuhi, atahanga, hononga ipurangi).

 

HMC1803 VUW 4A 5

Whakaahua 5: Te mahinga kia taea ai te tāpiri atahanga, kōrero anō hoki.

 

HMC1803 VUW 4A 5

Whakaahua 6: Te mahinga kia taea ai te whakamahi kuputuhi i roto i te ī-pukapuka.

 

HMC1803 VUW 4A 1

Whakaahua 7: Kua tāpiri katoatia ngā ihirangi.

 

HMC1803 VUW 4A 2

Whakaahua 8: Te whakarite URL kia taea ai te whakaputa te ī-pukapuka ki roto i te āhua hukihuki.

 

HMC1803 VUW 4A 4

Whakaahua 9: Te uhi o te ī-pukapuka whakamutunga.

 

HMC1803 VUW 4A 5

HMC1803 VUW 4A 5

Whakaahua 10: Te āhua whakatakoto whārangi o ngā ihirangi ī-pukapuka.

Ngā Hononga ataata

Whakatupuranga 5 – 5.1

Te Tāuru Tuhinga/Whakaahua
He ataata o te ākonga e tāpiri ihirangi ana ki te tūmau ipurangi.

Whakatupuranga 5 – 5.2

He Uiuinga Tangata 1 – He Kōrero Tikanga
He atatata o te māngai nō te rūnanga e uiuia ana mō ngā āhuatanga tikanga.

Whakatupuranga 5 – 5.3

He Uiuinga Tangata 2 – He Kōrero Tikanga
He ataata o te māngai nō te rūnanga e uiuia ana mō ngā āhuatanga tikanga.

Whakatupuranga 5 – 5.4

Te Whakarāpopoto i ngā Rangahau
He ataata o te ākonga e whakarāpopoto ana i ngā rangahau.

He whakawhiti kōrero

Kua uiuia e te ākonga tētahi tāngata nō te rūnanga ā-iwi e pā ana ki ngā tikanga o te waihanga i ngā pukapuka matihiko e pupuri ana i ngā kōrero tuku iho o te hapū/iwi, me te mana whakahaere o aua kōrero.

Tauira Tuatahi

Ākonga: He aha ōu whakaaro mō te tuku kōrero tuku iho ki te ipurangi?

Māngai Rūnanga: He pātai pai tēnā. Kua āta rukuhia mātou te whānau, te hapū ki ēnei momo āhuatanga o te whakatairanga i ngā kōrero tuku iho o te hapū, o te iwi kia pupuru ki ērā taonga mō ā tātou uri te take, mō ngā mea e noho ana i te kāinga, mō ngā mea e noho ana ki rāwāhi, ki Ahitereiria, ki Te Waipounamu rānei. Me te mea hoki he huarahi hei manaaki, hei tiaki i aua kōrero o ā tātou tūpuna ā-whakaahua nei, ā-whakapapa nei. Me te mea hoki me pūmahara ana tātou ki nga whakatūpatotanga ki ērā āhuatanga o te tiakitanga o te whakapapa, o te tiakitanga o ērā kōrero tuku iho, me ngā whakaahua e tūhono ana ki ērā o ngā kōrero hoki.

Ākonga: Me pēhea ngā tukanga whakaae?

Māngai Rūnanga: Mō te kaupapa nei, ā, nā tō mātou poari ā-hapū nei i tukuna atu ō mātou kairangahau hei haere ki te kimi i ngā kōrero, ka rua ka tukuna atu ki te hunga kaumātua, i reira ka kimi whakaaetanga. I te wetewetetanga o ngā kaumātua ka tukuna atu ki ngā marae o te hapū, i reira ka whakaae mai ngā marae ki aua kōrero me ngā whakatūpatotanga me pēwhea rā tātou e tiaki tika ai, kia whai mana ngā kōrero tuku iho o te hapū.

Ākonga: Kei a wai te tikanga me te mana whakahaere o aua kōrero?

Māngai Rūnanga: Ki a au nei kei te whānau, kei te hapū , kei te iwi te mana whakahaere, te tikanga mō aua kōrero tuku iho. Ahakoa nō mātou te tono atu ki a koutou kia waihangatia tētahi eBook kia whakatairanga i ngā pūrākau ō tātou, kei a mātou tonu te hapū te mana whakahaere, te mana pupuri i ērā taonga.

Tauira Tuarua

Ākonga: He aha ōu whakaaro mō te tuku i ngā korero tuku iho ki te ipurangi. He tikanga me mahi mō te tuku atu, mō te tiaki anō hoki?

Māngai Rūnanga: He pātai pai tēnā. Mō tēnei mea te tuku atu, ko ngā kōrero, ngā whakaahua, aua mahi, aua āhuatanga katoa, me mārama ngā whānau, ngā hapū, ngā iwi mehemea e whakaae ana rātou kia tuku atu aua kōrero, e wātea ana ki te ao katoa. Nō reira ko taku whakaaro, ētahi o ngā kōrero me noho ki roto i te whānau, me noho ki roto i te hapū. He wāhi tiaki i ngā kōrero ki roto i a mātou, mō ā mātou uri whakaheke. Ā, kei reira anō ētahi o ngā kōrero, ētahi o ngā pūrākau e whakaae ana kia tuku ki te ao, kia noho ēnā kōrero hei kōrero mō te rangahau, mō te kohikohi whakaaro, mō ngā iwi rerekē, ērā momo āhuatanga katoa.

Ākonga: Ka pēhea ngā huarahi me ngā waeture mō te rapu whakaaetanga ki te iri i ngā kōrero tuku iho ki te ipurangi?

Māngai Rūnanga: Tērā pea he nui ngā huarahi ka taea. Kei waenga i a matou me tō mātou hapū ka kohikohi haeretia aua kōrero, kātahi ka tuku ki ō mātou rōpū kaumātua ki te rapu whakaaetanga, ki te whakamana i aua kōrero pea. Mā tēnā, ka mōhio ai mātou, ā, he kōrero pono tēnei. Nō reira he mea nui tēnā, nā te mea e mōhio ana mātou ko ēnei kōrero ka tuku ki te ao, tērā pea ka noho tūturu aua pūrākau, aua kōrero ki roto i ngā tau, tekau tau, kōtahi rautau pea ki mua i te aroaro. Nō reira, e tika ka whakatauria, ka whakamanatia aua kōrero i waenga i a mātou i te tuatahi. Ā, ka mutu te wāhi o te kaumātua ka hoki ki ngā marae, nā te mea kei roto i tō mātou hapū e whā ngā marae. Nō reira, ko aua whānau, me whai wāhi anō rātou ki roto i tēnei whakaaetanga. Ehara i te mea he wāhanga māmā tēnei engari he mea me whai wā, me whakatakoto huarahi, kia kaua e oti i roto i te rangi kotahi tēnei tū āhuatanga. Nō reira, he mea tūturu te whakatakoto tikanga, waiture mā ngā whakaaetanga kia kōkiri te kaupapa mō ngā mahi ka tuku atu ki te ipurangi.

Ākonga: Kei a wai te mana whakahaere o aua kōrero?

Māngai Rūnanga: Kei tēnei kaupapa ki waenganui i a tātou, arā koutou o te kura me mātou o te hapū, i tō tātou whakaaetanga, ka noho te mana o aua kōrero ki a mātou, ki te rūnanga me ngā marae. Me pēnei te kōrero, mā tēnei huarahi ka tiaki i a koutou nā te mea kāore koutou e rongo ki te taumahatanga o ngā kōrero.  , he mea pai mō mātou nā te mea ka noho aua kōrero ki waenga i a mātou, ka taea e mātou te whakamahi i aua kōrero i roto i ngā tau e haere ake nei. Ehara i te mea ka herea mātou ki a koutou, koutou ki a mātou anō hoki, engari he whakaaetanga i waenganui i a tātou kia puta ēnei kōrero ki runga i te ipurangi, ki roto i te ī-pukapuka, me te mīharo anō hoki o tēnā mō ō mātou uri whakaheke.

 Rauemi
Aromatawai
Ka taea e ngā ākonga te:
  • Whakaatu i tāna otinga matihiko ki te akomanga.
  • Kōrero i ngā tikanga Māori kua whakaarohia.
  • Parahau i ngā whakataunga o te otinga matihiko.
Hononga ki te Marautanga
Tikanga ā-iwi Whenu: Te whakaritenga Pāpori me te Ahurea Taumata: 8
Rerenga kōrero

He aha ngā mea e hiahia nei tātou ki te mōhio?
What is it we want to know?

He aha ētahi otinga hangarau hei whakatutuki i ngā matea o te kiritaki?
What are some digital outcomes that can help us meet the needs of the customer?

He aha ngā painga o tāu otinga matihiko kua tuhia mai?
What are the advantages of the digital solution you have come up with?

He aha ngā hopanga ka puta mai i tāu otinga matihiko?
What are the issues that may arise with the digital solutions?

He aha ngā momo tikanga Māori, tikanga matatika hoki hei whakatūpatotanga mā koutou i roto i tēnei mahi?
What are some of the tikanga Māori and ethical considerations we need to be aware of within this mahi?

Rangahaua ētahi atu otinga matihiko pērā i tāu tauira.
Research some other digital outcomes that are the same as your example.

Ngā Kupu Hou / New Words
Kupu Māori
Kupu Pākehā

arotake

evaluate

auaha

creative, innovative

hanga otinga matihiko

developing digital outcomes

here

condition

hoahoa

design

hopanga

problem

huarahi wātea

opportunity

kiritaki

customer

kōtuitanga

synthesis

matatika

ethics
pāpori social
pāpā impact
parahau justify
pito kōrero article
rerehua aesthetics
urupare feedback, response
whaikiko purposeful
whakahīrautanga implications
whitiauau iterative