Kati
Ko te whakahaere tūmahi

Ko te whakahaere tūmahi

Tirohanga Whānui

He Whakataki

Kua tohua tētahi rōpū ākonga hei kanohi mā tō rātou kura ki te Koroneihana ki Ngāruawāhia. Kei te mōhio rātou ka noho rātou ki te pā o Ōmaero, heoi anō kāore anō te rōpū whānui kia tae ki Whatawhata, nō reira kāore, he iti rānei tō rātou mōhio ki te wāhi, otirā, te tangata whenua. Kua matapakina e ngā ākonga te āhua o te pōwhiri, ina koa, he mōhiotanga o te haukāinga, o tō rātou kawa mō ngā momo hui me ngā taipitopito pēnā i te ingoa o te whare, te maunga me te iwi hei whakamahi i te karanga me te whaikōrero. Ko te mahi mā ngā ākonga ko te kimi otinga e āhei ai ngā manuhiri ki te marae ki te whiwhi i tēnei mātauranga, kia mōhio ai rātou ki ngā tikanga i mua i te taenga atu, kia hōhonu ake ai hoki ngā whakawhitiwhitinga.

Tā tēnei mahi e whakaatu ana

Ka noho ngā ākonga ki te matapaki i te take, kei te haere rātou ki te koroneihana, ka noho ki te marae i tētahi wāhi tauhou ki a rātou, kāore ō rātou mōhio ki te hapū, ki te iwi rānei o reira. Ka whakaarohia ngā kōrero hei tautoko i te whaikōrero me te karanga i te tukanga pōhiri. Ka puta te māramatanga he raru tēnei mō te nuinga o ngā tāngata e pōwhiritia ana ki tētahi marae tauhou, ka noho rātou ki te ōhia manomano i ngā otinga matihiko e taea ai e te tangata ahakoa ko wai e toro atu ana ki tētahi marae tauhou, kia māmā ai te kimi i te mōhiohio e hiahiatia ana.

Ka puta ētahi otinga i ngā ākonga pēnā i te tuku īmēra ki te marae ki te kimi i te mōhiohio, te rapu i te mōhio mā runga ipurangi, mā te whārangi pāpori pāpāho o te marae rānei/hoki, te hanga taupānga e whai mōhiohio e hiahiatia ana, te hanga paetukutuku marae e taea ai e te tangata te uru atu, me te whakaaro o te waehere QR i te tomokanga o te marae. Ka tere puta te mōhio ki te rapu rātou mā te ipurangi, te pāpori pāpāho, me te paetukutuku o te marae (me he paetukutuku), mā rātou anake aua mōhiohio. Ka whakatau rātou kia rangahau i ngā āhuatanga pai, kino rānei o ngā kōwhiringa e toru e āhei ai tā rātou tiri ngāwari i te mōhiohio ki ētahi atu ka hiahia pea i ngā mōhiohio, arā, te hanga taupānga, te hanga paetukutuku, ngā waehere QR hoki. Ka puta te whakatau ko te huarahi pai mā tēnā, mā tēnā e rangahau ngā āhuatanga pai, kino rānei o tētahi o ngā whiringa, ka hoki mai ki te rōpū me ngā kitenga kia kōrero tahitia ai.

Ngā momo tikanga

Kua matapaki ngā ākonga i ngā momo whakahīrautanga o te pānga o te tikanga Māori, o te tikanga matatika hoki ki te tukanga rangahau, hoahoa hoki, ā, he aha anō hei whakaarotanga mā rātou kia mātua whakarite ka tiaki, ka manaaki rātou i a rātou anō, ka mutu, te marae, te hapū me te iwi i te roanga o tēnei tukanga. Kua oti i ngā akonga te whakatau kia kōrerohia te tikanga Māori me tō rātou mōhiotanga ki tēnei i te āhuatanga ki te mahi kei mua i te aroaro, otirā te tikanga matatika, ka puta i a rātou anō te pātai i te mea ka taea e mātou, me mahi tonu e mātou?’

Tikanga Māori

Ka kōrero ngā ākonga mō te hiranga o te whakaū mōhiohio ka riro i a rātou. Mā konei e whakatau kua whakamanahia ngā mōhiohio waehere QR e te marae, te hapū, te iwi. Kei te mōhio rātou he taonga ngā mōhiohio kua riro i a rātou, ehara nō rātou te taonga, nō reira me kaha manaaki ngā momo āhuatanga katoa o te taonga, tae atu ki tōna whakaaturanga.

He mōhio ngā ākonga he mea nui te kōrero ki te kaumātua i te roanga o tēnei tukanga, i te mea he hōhonu, he whānui tō rātou mōhio, māramatanga hoki ki te hītori me te whakapapa o te marae, e āwhina hoki rātou i a koe ki te kohi mōhiohio, e whakatika hoki i ngā mōhiohio e hapa ana.

He mārama ngā ākonga me tika te whakamihi i te marae, i te hapū me te iwi mō te katoa o ngā kōrero, me ngā āwhina, ki a rātou anō hoki ngā kaipupuri o aua kōrero, arā, ngā kōrero ka whakamahia.

Tikanga Matatika

Kua mōhio ngā ākonga ko te mātāpuna, arā, ngā kaipupuri o te kōrero e kohia ana ko te marae, ko te hapū, ko te iwi hoki, kei a rātou hoki te mana o aua taonga. Kua mārama ngā ākonga me whai whakaaetanga katoa mai i mua i te tuku i ngā mōhiohio ki tētahi wāhi tūmatanui, me whai kōrero, whakaaro hoki, me whai whakaaetanga mai hoki i te marae mō te āhua o te whakarite ki tētahi wāhi tūmatanui. Tuatahi mai, matua mai kei te mōhio rātou ahakoa ka taea te kimi mōhiohio katoa mā te pūrere rapu ki te kimi mōhiohio ka hiahia rau atu rātou ki tā rātou waehere QR, me whakapā tonu rātou ki te marae i te tuatahi kia whai whakaaetanga mai ki te hanga waehere QR mō te marae. Kua matapakina hoki e ngā ākonga he tukanga o te whakamana mōhiohio ka riro mai hei rau atu hoki ki roto ki te waehere QR. Tērā pea kua oti kē i te marae, te hapū, te iwi rānei tēnei tukanga, heoi anō mēnā kāo, me whakarite tētahi tukanga mai i te tīmatanga. Mā konei e mōhio ai rātou ka manaakitia te mana o te marae, o te hapū, o te iwi, kia whai taunakitanga tūmatanui e whakamanahia ana, e tautokohia ana hoki ā rātou ake mahi e te marae.

Kua matapakina e ngā ākonga te mōrea o te whakahāwinitanga o te mōhiohio, he mōhio hoki me tuhituhi tētahi tuhinga e whakaahua ana i ngā herenga. Mā konei ka mōhio ngā ākonga ki ngā mōhiohio e tika ana kia pupuri, me pēhea hoki te whakamahi, e āwhina hoki rātou kia mōhio ki ngā manatārua, ā, ka manaakitia ngā motika whakairoiro hinengaro.

Te Hanga Taupānga
Ngā Pai
  • He ngāwari, he māmā te whakamahi.
  • Mā te pēhi pātene noa e taea ai ngā mōhiohio.
  • Ka taea te tāpiri mōhiohio ina hiahiatia.
  • He waea, he pūrere tā te katoa.
Ngā Kino
  • Te utu – he nui te utu ki te whakawhanake taupānga He roa te wā.
  • Me rite tonu te whakahou – me tautiaki, mā tētahi tangata/kamupene e whakatika ai ngā paku raru, e whakahou, mā konei ka nui ake ai pea te utu.
  • Ka taea te taupānga e te ao katoa, kei whakahāwinitia te mōhiohio.
Waehere QR
Ngā Pai
  • Karekau he utu, he iti rānei te utu hanga.
  • Kāore e roa te hanga.
  • Kāore he utu mō ngā taupānga pūpānui QR i Toa Whitiata me te Toa Taupānga.
  • Ehara i te mea me rite tonu te whakahou.
  • Ka puritia ngā kōrero katoa e hiahiatia ana.
  • Kotahi te pā ki te pātene kua puta katoa mai.
  • Ka taea he waehere QR e ngā marae katoa – ka waiho tēnei ki waho o te tomokanga, ka tāngia hoki ki te tuarā o te kāri pakihi o te marae.
  • He māmā te whakamahi – ka taea e te katoa te whakamahi waea ki te karapa.
Ngā Kino
  • Me whai taupānga pūpānui QR ngā kaiwhakamahi kia whiwhi mōhiohio.
  • E kore e taea pea e te tangata te tae ā-tinana atu engari ka hiahia tonu rātou ki ngā mōhiohio.
  • E wātea ana ngā mōhiohio ki ia tangata, ia tangata ka hipa atu i te marae.
Te Hanga Paetukutuku
Ngā Pai
  • He waihanga mātāpuna mōhiohio mā te tangata ka hiahia rangahau.
  • He māmā te uru atu mā ētahi atu.
  • He utu kore, he tere hoki te hanga i tāu ake.
  • Ka noho mō ake tonu atu.
  • Ka tāpiri mōhiohio atu ahakoa te wā.
  • E taea ai ngā marae katoa me ōna mōhiotanga te whakarārangi.
Ngā Kino
  • He roa pea te hanga.
  • E kore pea ētahi iwi e whakaae kia tukuna ō rātou mōhiohio ki te ao, ka hiahia pupuri rānei rātou i ō rātou mōhiohio ki a rātou anō Te utu – ka haere tonu pea te utu.
  • Te whakahou me te tautiaki i te pae.
  • Ka paku raru pea te paetukutuku, ka hinga pea ngā tūmau.
  • Kāore he ahokore, raraunga waea pūkoro rānei o ngā kaiwhakamahi.
  • Ka uaua pea te kimi i te pae.
  • He whakapōraru, he uaua pea te whakamahinga.

Ka hui ngā ākonga ki te whakaatu i ā rātou kitenga ki te rōpū. Ka mutu te kōrerotanga o ngā pai me ngā kino o ia kōwhiringa, ka whakatau rātou kāore he utu o ngā waehere QR, he wātea ki te tangata, ka puritia ngā kōrero kāore he mate mō te whakahou, mō te rite tonu rānei o te tautiaki. Ka mutu tēnei te whakatau, ka kōrerohia e rātou ngā whakaaro mō ngā tikanga e tika ana kia whakaarohia i te taha ki te kohinga me te whakaputunga o ēnei mōhiohio.

Tikanga Māori
Kaumātua
  • He mea nui kia kōrero ki te kaumātua i te roanga o te tukanga, he hōhonu te mōhio, e taea ai hoki e rātou te āwhina te kohinga mōhiohio e hiahiatia ana. Ka taea hoki e rātou te whakatikatika ngā kōrero hē, me te hoatu māramatanga  ōhonu, whānui ake o te hītori me te whakapapa e noho tūāpapa ana ki te kōrero.
Ko te mōrea o te kōrero hē
  • Me whakamana te kōrero, kaua e kohi me te whakaatu kōrero kua kohia noatia i runga ipurangi, kua rongo ā-taringa noa mai rānei i te waha o ētahi atu.
Mātauranga
  • Te manaaki i te kōrero ka whakawhiwhia, me te tiaki hei taonga.
Tikanga Matatika
Te Tono me te Whakaaetanga
  • Ko te mātāpuna o te kōrero, ko te marae, ko te hapū me te iwi, ko rātou hoki ngā kaipupuri o ngā kōrero, ko rātou hoki kei te pupuri i tōna mana. Me whiwhi ngā whakaaetanga katoa i mua i te tuku mōhiohio ki tētahi wāhi tūmatanui.
Te whakamanatanga o te mōhiohio
  • He whakarite tukanga o te tiki mōhiohio i ētahi tāngata tōtika noa iho (kua oti kē pea tēnei i te marae).
Te Whakahāwini
  • Whakaritea tētahi whakaaetanga ki te marae, e kī ana he aha ngā mōhiohio e tika ana kia puritia, me pēhea hoki tā mātou whakamahinga.
Kaipupuritanga
  • Ehara mātou i te kaipupuri o te kōrero, engari he kaitiaki mātou.
  • Me āta whakarite ka tiakina te mana tārua me ngā motika whakairoiro hinengaro.
  • Mihi ki ngā tāngata o te marae/hapū/iwi.

Mutu ana te matapakina o ngā whakahīrautanga, ka whakatau ngā ākonga ki te hanga i te waehere QR e pupuri i ngā ingoa o ngā maunga, o ngā awa, o ngā marae, o ngā whare tūpuna, o ngā wharekai, o ngā hapū, o ngā iwi, o ngā waka me ngā kōrero whakapā mō te marae ake. Ka whakapā atu rātou ki ngā marae ki te kōrero ki a rātou mō tō rātou hiahia, me te kimi tukanga, whakaaetanga hoki e tika ana kia pai ai te whakaoti i te waehere QR, kia āta whakarite hoki e tiaki ana rātou i a rātou, i te marae anō hoki, ka mutu e hāpai tonu ana i te mana o te hapū, o te marae hoki i ngā wāhanga katoa o te kaupapa.