Kati
Ko te whakatau tikanga whakaoti hopanga

Ko te whakatau tikanga whakaoti hopanga

Tirohanga Whānui

He Whakataki

Kei te akomanga. Kua whai urunga te nuinga o ngā tamariki i te akomanga ki te ipurangi ahokore, ngā pūrere matihiko (papahiko, waea whakaahua, rorohiko rānei) i te kāinga. Kua ako rātou mō te Scratch i ngā akoranga o mua, kua tiro hoki rātou ki tētahi tātauira waehere māmā noa iho, me tana whakamahinga i te waihangatanga o tētahi hākoritanga, i tētahi kēmu hoki/rānei.

Tā tēnei mahi e whakaatu ana

Ko tā te ākonga he kōrero mō ngā momo āhuatanga noho tahi a ngā whānau me te tīpako i tētahi ngohe ngahau ki a rātou, ki te whānau. Ka whakatau te ākonga ki te waihanga i tētahi hākoritanga e pā ana ki te hī ika i te taha o tōna tuakana. Ka whakamārama ia koia anake te wā ka ngahau i te taha o tōna tuakana ko rāua anake, kāore he mea atu. Ka whakamahi te ākonga i te rorohiko pōnaho ki te huaki i pūtirotiro tukutuku, ka tūhono atu ki te paetukutuku Scratch. Ka whai ia i te tukanga ki te waihanga i tētahi pūkete Scratch, me te whakamana i te pūkete mā tētahi īmēra kua tukuna ki a ia mai i te taupānga ipurangi Scratch. Ka pato te ākonga i te kupu ‘fishing’ ki te pae rapu o Scratch, ka tirohia ngā tātauira e wātea ana, i mua i tana kōwhiri i te ‘Fishing’ he mea i waihangatia e tētahi atu kaiwhakamahi Scratch ko Luffy Lit. Ka pāwhiri i te pātene ‘See Inside’ ki te huaki i te waehere tātauira, ka pāwhiri i te pātene ‘Remix’ kia taea ai te waihanga huringa me te tiaki i te tūmahi ki tōna pūkete.

Ka tiro te ākonga i te waehere mā te pāwhiri ki Scripts, ka mea te waehere poraka ngāwari kia pāwhiria te kapa kākāriki ka tīmata ai te hākoritanga mai i te ‘costume 1’ (te tāpare tuatahi i te raupapa). E mea ana te poraka kahurangi ka peke te rangipokohu (ahanoa) ki roto i tētahi kākahu hou i roto i te wā kua whakaritea (kua kaute ā-hēkona) kātahi ka āhei ki te peke ki tētahi atu kākahu o te raupapa. Ka whakamātau te ākonga i ētahi angawā kē me te whakatau he pai te 0.5 hēkona. Kei te mōhio rātou mā ngā poraka ‘Forever’ me te ‘Next costume’ e tuku te hākoritanga kia haere tonu, ki ngā kākahu katoa o te raupapa.

Kātahi ka pāwhiri te ākonga i te tahua kākahu (costumes), ka pāwhiritia ia kākahu o te raupapa ki te tiro i ngā kōrero. Ka kite rātou i ngā wāhi i tāurua ngā kuputuhi me ngā kiripuaki, arā, ngā mea e tika ana kia whakakapia. Ka whakatau rātou kāore he take o ngā kākahu whakamutunga e whā e whakaatu ana i ngā kupu ‘The End’, ā, ka muku. Kātahi ka pāwhiri te ākonga i te ‘costume 1’.

Ka tautohu ia i te tahua papamuri hou, ka pāwhiri i te ata ‘Kōwhiri papamuri mai i te puna’ ka tirohia ngā papamuri e wātea ana, i mua i te kōwhiri i te mea pai ki a rātou. Ka muku ia i te papamuri o mua, ka pāwhiri ki te kapa kākāriki kia kite mēnā ka noho te papamuri hou i ia huringa o ngā kākahu. Ka waiho te ākonga i te kiripuaki taketake (te ngeru) i te kākahu 1 hei kanohi māna, ka tāpiri hoki i tētahi atu hei kanohi mā tōna tuakana (te makimaki). Ka toai tēnei tukanga ki te katoa o ngā kākahu e toe ana. Ka hoki rātou ki ngā kākahu e tika ana kia panonitia te kuputuhi, ka whakamahi rātou i te tahua taha hei tīpako i te kuputuhi hei muku, hei tāuru i ngā kuputuhi hou. Kei te mōhio rātou ka taea te tāpiri ētahi atu āhua, tae hoki, mēnā e hiahiatia ana me te tautohu i te whakamahinga taketake o ēnei i roto i te tātauira. Kia mutu te panoni/ tango/tāpiri i te kuputuhi, ka whakamātauria te hākoritanga e te ākonga mā te pāwhiri i te kapa kākāriki. Kei te mōhio ia mēnā kāore e pai ki a ia, ka taea te tautohu ngā kākahu kāore i te tika, ka whakamahi rātou i te tahua taha hei panoni.

Kātahi ka pāwhiri te ākonga i te ‘See Project Page’ ki te tiaki i ngā panoni me te nuku ki te whārangi whakamōhiotanga. Ka panoni ia i te ingoa o te kaupapa ki ‘Hī Ika – Fishing 2 remix’, ka panoni rātou i te tohu hāhe me te tāpiri i tētahi kōrero poto ki te pouaka ‘Notes and Credits’ hei mihi ki te kaiwaihanga o te tātauria taketake. Ka kite rātou i tētahi mihi i raro, he mihi anō ki te kaiwaihanga taketake. Kātahi ka pāwhiri ia i te kōwhiringa tuari kei te upoko o te whārangi, kia āhei ai ētahi atu te whakauru ki tā rātou hākoritanga. Ka whakaatu te ākonga i te hākoritanga ki te kaiako, ka kōrerohia e rāua te tukanga i whāia me ngā panonitanga ki te whakawhaiaro i taua tātauira.

Ngā momo tikanga

Kua kōrero kē ngā ākonga i te tikanga kia mihia te kaiwaihanga o te tātauira taketake kua whakatau rātou kia whakamahia. He ōrite te whakamahinga o te tātauira Scratch ki te whakamahinga o te waiata nā tētahi atu i tito mō te mahi kapa haka, te whakahua rānei i te kōrero a tētahi atu. Kua mārama rātou ahakoa e wātea tūmatanui ana te tātauira Scratch ki te tangata hei whakamahi me te whakarerekē ahakoa ko wai, he mea nui kia mihia te mahi a te kaiwaihanga taketake ki te whakarite i te waehere poraka mō te tātauira. Kei te mōhio ngā ākonga e kitea te ingoa o te kaiwaihanga taketake i te taha o ia tātauira e wātea ana, ā, kei roto hoki i te tukanga waihanga he wāhi tika hei mihi i tēnei tangata.

 

I tikiake mai i http://technology.tki.org.nz Ko te Scratch™ he mea waitohu nā te Scratch Team, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga Scratch™. Kāore tēnei papatono e tautokotia ana e te Tāhuhu o te Mātauranga.