Kati
Ko te waihanga papatono rorohiko

Ko te waihanga papatono rorohiko

Tirohanga Whānui

Ko te waihanga papatono rorohiko

Ka mārama ki tēnei mea te hātepe, ki te rerekētanga i waenga i te hātepe me te papatono, ā, ka neke atu i te kotahi te hātepe ka taea mō te rapanga/hopanga kotahi. Ka taea te whakaraupapa rapanga/hopanga ki ngā tohutohu māmā ki te hanga hātepe mō te papatono rorohiko, ka whakamahi i ngā whakaaro raupapa ki te matapaki i te whanonga o ēnei papatono. Ka taea te whakahiato, te patuiro hoki i ngā papatono e whakamahi ana i ngā tāuru, i ngā tāputa me ngā raupapanga me ngā koromeke. Kua mārama hoki e rua ngā āhuatanga mō te pupuri raraunga, ko ngā mati tāhūrua ēnei (ngā moka).

Ngā putanga ako

Ka taea e te ākonga:

  • te whakamahi i tētahi papatono, pēnā i a Scratch, ki te hanga hātepe mō tētahi papatono rorohiko hei whakamōhio i te whānau ki te ara tōtika, ki te ara mōrearea kore ki te marae
  • te matapae i te whanonga o te papatono e ai ki te hātepe i hangaia e rātou
  • te patuiro (arā, te rapu hapa me te whakatika) i ngā papatono māmā e whakamahi ana i ngā tikanga tāuru, tāputa, raupapa, koromeke hoki
  • te whakamārama ki te whānau i te ara ki te marae, ki ngā tikanga huhua hoki (Tīemiemi, Tīhau, Pukamata, Tiriata, Atapaki, te mea, te mea).
Ngā mōhiotanga

E mārama ana te ākonga:

  • ko ngā hātepe he kohinga tohutohu māmā, e āta rārangihia ana hei whakaoti rapanga/hopanga, ā, hei tuhi papatono rorohiko hoki
  • e tika ai te mahi o tētahi papatono rorohiko, me tika, me mārama ngā hātepe (tohutohu) hei whai
  • ahakoa te rerekē o ētahi o ngā hātepe, ka taea tonu ngā putanga ōrite i te papatono rorohiko
  • ko tētahi o ngā reo o te papatono rorohiko e whāia ana, arā, ko te waehere tāhūrua, ā, e 2 noa iho ana tau, ko te 0 me te 1
  • ki te Waehere Tāhūrua, ko te te raupapa me te auau o te 0 me te 1, e tohu ana i ngā hātepe rerekē.
Horopaki

Ka tūhuratia e ngā ākonga te tikanga o te manaaki tangata i te wā o te aituā ā-taiao i tō rātou hapori. Nā te ohorere o te aituā, tokomaha ngā whānau e toro atu ana ki te marae hei wāhi noho.

Rauemi
  • Kiriata 1 - I hangā ki te papatono Scratch
  • Kiriata 2 - I hangā ki te papatono Scratch
  • Ekea kiriata - I hangā ki te papatono Dash me tana taupānga ‘Wonder Dash’
Ngā Kupu Hou / New Words
Kupu Māori
Kupu Pākehā

aituā ā-taiao

natural disaster

hātepe

algorithm

karetao

robot

koromeke

loop

Mati tāhūrua

binary digits

moka

bit

papatono

programme

patuiro

debugging

tāhūrua

binary

tāputa

output
taupānga application (app)
tāuru input
waehere tāhūrua binary code
whakaoti rapanga/hopanga problem solve

I tikiake mai i http://technology.tki.org.nz Ko te Scratch™ he mea waitohu nā te Scratch Team, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga Scratch™. Kāore tēnei papatono e tautokotia ana e te Tāhuhu o te Mātauranga.