Kati
Ko te whakatau tikanga pūnaha tūturu

Ko te whakatau tikanga pūnaha tūturu

Tirohanga Whānui

He Whakataki

Kei te akomanga. Kua waia ngā tamariki ki te whakamahi i te papahiko ki te tākaro kēmu hei tautoko i ā rātou mahi akoako. Kei te nuinga o ngā tamariki te urunga ahokore ki te ipurangi me ngā pūrere matihiko (papahiko, waea pūkoro, rorohiko rānei) i te kāinga.

Tā tēnei mahi e whakaatu ana

Ko tā ngā ākonga ko te whiriwhiri i te taupānga matihiko hei whakamahi mā rātou. Ka kōrero rātou mō te Kahoot! te Quizlet me te Explain Everything. Ka whakatau ki te whakamahi i te Kahoot!, i te mea, koia te mea tino pai mō te waihanga patapatai, koia hoki te mea hou rawa o ngā taupānga e toru, he ngāwari hoki te whakamahi i a Kahoot! mō te kaiwaihanga me ngā kaiwhakauru.

Ka ōhia manomano ngā ākonga i ngā wāhi kua toroa e rātou i roto i te rohe o Te Tauihu, he wāhi tāpua ki ngā iwi o te rohe, ā, ka whakamahia tēnei ki te tuhi i ngā pātai tekau mō tā rātou patapatai. He kōwhiringa maha tēnei patapatai, nō reira ka tuhia ngā whakautu tika, me ngā whakautu kē e toru mō ia pātai. Ka whakamahi ngā ākonga i te puku atahanga ki te rapu i tētahi whakaahua e hāngai ana ki ia pātai, ka tiakina aua pātai ki te papahiko, rorohiko rānei hei whakamahi ā muri ake nei.

Ka huaki ngā ākonga i te pūtirotiro rapu kia haere ki te puku atahanga. Mā te whakamahi te puku atahanga, ka rapu rātou i ngā whakaahua e hāngai ana ki te whenua me te hītori o te rohe, hei tāuru atu ki tā rātou patapatai.

Kātahi ka tūhono ngā ākonga ki te paetukutuku Kahoot! Ka takiuru atu rātou ki Kahoot!, ka pāwhiri i te kōwhiringa Create Kahoot! > Quiz. Ka tāuru i te taitara, Te Tauihu o te Waka, me tētahi whakamārama poto. Ka whakatau rātou i te reo me te momo minenga e hiahiatia ana (School), ka pāwhiri i te Go. Kātahi ka tāuru ngā ākonga i te pātai tuatahi. Ka whakarite rātou i te wā mō te minenga ki te whakautu i te pātai, ka whakatau he pai te 20 hēkona mā ngā kaiwhakauru ki te whakautu i ngā pātai. Kātahi ka tāuru rātou i ngā whakautu kōwhiringa maha e whā e hāngai ana ki te pātai.

Kātahi ka tautohua ko tēhea te whakautu tika mā te pāwhiri i te ata tika. Ka pēhi rātou i te pātene tikiake whakaahua, ka tīpako i te whakaahua e hāngai ana hei tāpiri ki te pātai. Kei te mōhio rātou ki te hapa tētahi o ngā mahi nei ka hua mai ko ngā pātai/whakautu hē, ka hapa rānei ētahi wāhanga i te patapatai whakamutunga. Kātahi ka pāwhiri rātou i te pātene Next, ka tōai i tēnei tukanga mō ngā pātai e toe ana. Ko te mahi ināianei ko te tiro i ia whārangi patapatai ki te aromātai me te whakatika i ngā mea kua hapa, arā, ngā pātai, ngā whakautu, ngā tepenga wā, ngā pikitia, aha atu, aha atu. Kei te mōhio rātou ka taea te whai taua ara anō ki te whakatikatika i ngā hapa o te tukanga waihanga. Kātahi ka tiaki ngā ākonga i te patapatai ki tā rātou pūkete Kahoot! Ka ngana ngā ākonga ki te tiaki i te patapatai kia puta tūmatanui atu tā rātou patapatai, heoi anō kāore i taea. Ka tirohia ngā tautuhinga patapatai, ā rātou ake tautuhinga patapatai, kāore tonu i kitea te rongoā. Ka whakatau ngā ākonga ki te tiro i Google mō te rongoā. Ka tāuru i tā rātou pātai ki Google, ka kitea kāore a Kahoot! e whakaae kia waihanga patapatai tūmatanui te hunga i raro i te 18 ngā tau. Ka kōrerohia tēnei, ka whakatau e taea tonutia ana te tuari ki te kaiako me ngā hoa akomanga mā tā rātou ake pūrere, me te whakamahi i te pouaka whakaata atamai kei te kura. Ka huaki ngā ākonga i te mata Purei, ka tīpako i te kōwhiringa Classic 1:1. Ka tuaritia te waehere kēmu ki tō rātou kaiako me tētahi hoa akomanga, ka tatari kia whakauru rāua ki te patapatai. I te kaiako me te hoa akomanga e tākaro ana i te patapatai, ka ārahi ngā ākonga i te patapatai mā te pāwhiri kia haere ki ia pātai, kia oti ngā kaiwhakauru e rua te whakautu i te pātai i mua.

Mutu ana te kēmu, ka tuku te ākonga i ngā pātai e whai ake nei:

  • He uaua/māmā te tākaro i te patapatai? He aha ai?
  • E hāngai ana ngā pātai ki te kaupapa? Pēhea nei?
  • He pēhea te tere o te patapatai ki ngā kaiwhakauru?

Kātahi ka kōrerohia e ngā ākonga ngā āhuatanga hei whakarerekē i roto i te patapatai e ai ki ngā urupare.

Mā te whakaoti i tēnei ngohe, ka whakaatu ngā ākonga i tō rātou:

  • mārama ka rerekē haere ngā pūrere matihiko i roto i te wā me te whakaawe/pānga a aua pūrere ki te tangata/porihanga
  • mārama ki ngā tūranga o ngā wae i te whakauru takenga, te tukanga, te pūnaha whakaputanga me te āhua o te mahi tahi
  • te mārama ka panonitia ngā whakauru ki te whakaputanga i roto i te pūnaha takenga, me te tūranga ‘mana’ a te tangata
  • āta whai kia whakapiki i te whānui o ngā momo taupānga e taea ana te whakamahi (momo pūmanawa, momo kōnae hoki) i ngā tāuru me ngā tāputa.
Ngā momo tikanga

Kua wānangahia e ngā akoranga te pūtake o te pūrere matihiko, arā, te pupuri me te tuku o ngā mōhiohio. Kua whakatauritea te whakamahinga o ngā pūrere matihiko hei hopu kōrero, hītori hoki ki ngā āhua i whakamahia e ō tātou tūpuna hei pupuri me te tuku i ngā kōrero pērā i te whakairo, te tukutuku, te waiata, te aha atu, te aha atu. Kei te mōhio rātou ahakoa ka taea te whakamahi ngā utauta o mua ki te pupuri me te tuku mātauranga, mōhiohio hoki, he ara anō ngā taupānga me ngā pūrere matihiko e tutuki ai tēnei mahi.

 

I tikiake mai i http://technology.tki.org.nz Ko te Classflow he mea waitohu nā Promethean World, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga Classflow. Kāore tēnei papatono e tautokotia ana e te Tāhuhu o te Mātauranga.

I tikiake mai i http://technology.tki.org.nz Ko te Kahoot! he mea waitohu na Kahoot! Services, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga Kahoot!. Kāore tēnei papatono e tautokotia ana e te Tāhuhu o te Mātauranga.

I tikiake mai i http://technology.tki.org.nz Ko te Explain Everything™ Interactive Whiteboard he mea waitohu nā Explain Everything™ Interactive Whiteboard, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga Explain Everything™ Interactive Whiteboard. Kāore tēnei papatono e tautokotia ana e te Tāhuhu o te Mātauranga.