Kati
Whakaputa ngohe i runga ipurangi

Whakaputa ngohe i runga ipurangi

Tūmahi

Whāinga:

Ka whai i ngā tikanga mō te tūhuratanga tauanga e whai wāhi mai ana te raraunga whakarōpū matatini, te raraunga motumotu tatau, me te raraunga houanga:

  • ka whakatakoto pātai;
  • ka whakaputa kōrero hei whakautu i te pātai i tūhuratia;
  • te hanga pātai ki te rapu mōhiohio mō tētahi take;
  • te waihanga i tētahi tūmahi tauwhitiwhiti mā te whakamahi i te taupānga taketake;
  • te whakamātau me te whakahaere tūmahi tauwhitiwhiti me ō hoa.
Putanga ako
Ka taea e te ākonga:
  • te whakamahi i te pūkaha rapu;
  • te whakauru ki te punaha tuihono;
  • te hono i ngā pūnaha, tētahi ki tētahi;
  • te waihanga tūmahi aromatawai.
Paearu angitu
Ka angitu te ākonga mēnā ka taea e ia:
  • te whakamahi i te paetukutuku o ClassFlow, o Kahoot rānei
  • te whakauru atu ki te pūkete o ClassFlow, o Kahoot rānei
  • te hono atu i tētahi pūrere ki tā rātou tūmahi aromatawai
  • te tuku i ā rātou mahi aromatawai ki te akomanga.
He Tauira Ngohe:

Kohikohi raraunga mō te pāmahana o te rangi ia 15 meneti o te rangi kotahi mai i te ata ki te ahiahi. Whakawhitia tēnei raraunga ki tētahi raraunga houanga. Waihangatia he pātai, he whakautu e pā ana ki te raraunga. Waihangatia he ngohe whiringa maha (multiple choice) i te pūmanawa o ClassFlow.

Tūmahi Matihiko

Kua whakamahia ngā ākonga ki te waihanga tūmahi aromatawai matihiko, ka tuari me ō rātou hoa mā te whakamahi i ngā pātai i whakautua e rātou i roto i te waehere urupare, o te tūmahi kaihamu kimi meka e pā ana ki te pepeha o te marae o Hiruharama ki Ngāti Porou, te wāhi e noho nei rātou i te pito o tēnei wāhanga tau ā-kura. Kei ngā ākonga te tikanga ko tēhea o ngā taupānga ipurangi ka whakamahia e rātou, ko te ClassFlow, ko te Kahoot rānei hei waihanga i tā rātou mahi.

Ngā whakaritenga
  • Ka tāia e te kaiako ngā puka tūmahi waehere urupare i hangaia e ngā ākonga i tērā atu o ngā tūmahi, arā, te: Waehere Urupare – Online Fact Finding Treasure Hunt.
  • Ngā pūrere matihiko i tāuta kētia ai ki te pūpānui waehere urupare, ClassFlow Student 
  • Kua whakahikoa ngā pūrere.
Whakataki

Kōrerotia ngā whāinga, ā, ka matapaki ai i te tūmahi. Pānuihia ngā paearu angitu.

Tīmatanga

Ka noho te ākonga ki te tohu i te pukamahi:

  • ki te pānui i ngā pātai me whakautu;
  • ki te whakamahi i tētahi pūrere matihiko hei pānui i te waehere urupare ki te huaki i te URL e kitea ai ngā whakautu ki ngā pātai;
  • te whakautu i ngā pātai, ka tuhi ki te pepa, ki tōna pukamahi rānei;
  • te karapa i te waehere urupare tuarua ki te tiro mēnā he tika ngā whakautu.
Waenganui

Mā te ākonga tonu e whakarite ki te whakamahi i te taupānga ClassFlow, i te Kahoot rānei ki te waihanga tūmahi aromatawai matihiko.

  • Te whakamahi i te pūtirotiro ki te rapu i te taupānga taketake.
  • Te uru atu ki te pūkete a-ipurangi.
  • Te whakauru raraunga ki ngā tūranga e tika ana.
  • Te tiaki i te tūmahi aromatawai.
  • Te tiro anō ki te tūmahi aromatawai ka panoni mēnā ka hiahiatia.
  • Te hono i te rorohiko ki ngā pūrere matihiko.
  • Tuari me te whakahere i tētahi tūmahi aromatawai me ōna hoa.
Katinga

Tirohia anō ngā whāinga me ngā paearu angitu.

Pātaihia ngā ākonga he aha:

  • tētahi mahi i ākona e koe
  • tētahi mahi uaua
  • tētahi mahi tino pai
  • tētahi mea i pā i te tirohanga a ō hoa ki te patapatai.

He taunaki mahi

Tā te ākonga

Ka whakatau a Milla ki te whakamahi i te taupānga ClassFlow i runga ipurangi ki te waihanga i tana tūmahi aromatawai i te mea he whānui āna momo whiringa ngohe hei whakamahi. Kei te mōhio ia ka taea te tūmahi te tuku i taua wā tonu kia whakaotia e ngā ākonga i runga rānei i ā rātou pūrere pūkoro, i runga rānei i ngā rorohiko akomanga me ngā rorohiko pona.

Ka tīmata ia i te tūmahi mā te whakamahi i te paetukutuku rapu ki te rapu me te tāuru ki te paetukutuku ClassFlow. Ka takiuru a Milla ki tana taupānga ClassFlow mā te pūkete o tōna kaiako. Ka tīpako ia i te ngohe hou hei waihanga ka tīmata ki te kōkuhu i ngā pātai ki ngā āpure i te tīwae 1 me ngā whakautu ki ngā āpure i te tīwae 2. Kātahi ka arokitengia, ka whakamātauria, ka tiakina e ia ngā whakarerekētanga ki te tūmahi.

 

Ataata 1: Te waihanga ngohe ClassFlow

 

Ka whakaaro a Milla ki te whakawai i te tukanga o te hono i tana ngohe ClassFlow ki tētahi pūrere matihiko. Tuatahi, ka kimi ia i tana ngohe ka tīpako ia i te ‘Tuku’ mā reira ka waihangaia he waehere akomanga ahurei kia whakamahia e ngā ākonga ki te hono ki tētahi ngohe i runga ipurangi, ki tētahi akoranga, ki tētahi akomanga rānei. Mai i te papahiko ka huaki ia i te tomokanga ipurangi ākonga o ClassFlow kua tiakina kētia ki ngā papahiko katoa o te kura. Ka tāuru ia i te waehere akomanga ahurei, tana ingoa ka tatari kia honoa. Ka hono ana ka taea te tūmahi aromatawai te tuku ki ngā pūrere o tēnā ākonga, o tēnā ākonga, ki te katoa rānei o te akomanga.

 

 

Ataata 2: Te hono Classflow ki te pūrere matihiko

He whakawhiti kōrero

Kaiako: He aha tētahi tāuru o te pūmanawa ClassFlow?

Ākonga: Ko te whakaurunga o ngā pātai me ngā whakautu.

Kaiako: He aha tētahi tāputa o te pūmanawa ClassFlow?

Ākonga: He nui ngā tāputa. I te wā ka pāwhiri i te pātene ‘preview’ ka puta mai te ngohe pāhekoheko. I te wā ka tuari i te ngohe ki te pūrere matihiko he tāputa hoki tērā.

 

'He whakawhiti ā-tuhi tēnei o tētahi kōrero tūturu.'

Rauemi
Aromatawai
Ka mōhio ngā ākonga ki:
  • te whakamahi pūrere matihiko ki te karapa waehere urupare, hei rapu mōhiohio kōrero mō tētahi take
  • te whakamahi i tētahi papatono ki te tuari i ngā ngohe matihiko.
Hononga ki te Marautanga
Pāngarau Whenu: Te Taunga me te Tūhuratanga Tauanga Taumata: 3
Rerenga kōrero

He aha …?
What?

He aha i … ai?
Why?

Nā te aha ai i …?
Why?

Ko wai?
Who?

Kei whea?
Where?

E hia?
How many?

Tokohia?
How many (people)?

Ngā Kupu Hou / New Words
Kupu Māori
Kupu Pākehā

papahiko

tablet

ngohe matihiko

digital activity

paetukutuku

website

pūmanawa

software

raraunga houanga

time series data

taupānga

application, app

pūnaha tūturu

fundamental system

pūrere

device

ripa

tab

tahua

menu
tuari share
tāputa output
tāuru input
waehere urupare quick response (QR) code