Kati
Ko te rorohiko hei pupuri kōrero

Ko te rorohiko hei pupuri kōrero

Tirohanga Whānui

He Whakataki

Kei te akomanga. Ka haere ngā ākonga ki ngā akomanga hangarau matihiko mō te wā kotahi i ia wiki. Ko ā rātou mahi he ako me pēhea te mārei, te whakatikatika, te raka pouaka kuputuhi me ngā ahanoa i roto i ngā tūtohi hura. Kua ako hoki rātou ki te whakawhiti i te kuputuhi mai i te ipurangi ki tētahi tūtohi hura, ki te raweke, te whakarahi me te nuku ahanoa.

Tā tēnei mahi e whakaatu ana

Ko tā Reihana whakautu ki te ngohe, he tīpako i te kaupapa o Matariki, he mea kua roa nei e wānangatia ana e rātou i te pūtaiao. Ka whakamahi ia i te pūrere rapu o tētahi pūtirotiro tukutuku hei rapu i ngā kōrero mō Matariki. Kei te mōhio ia, patohia ana ngā kōrero rapu, kupu matua rānei ki te reo Māori ka reo Māori te nuinga o āna hua rapunga. Ka pato ia i te kōrero ‘He aha a Matariki’ ka rapu hoki ia i te rārangi hua ki te kimi, ki te tīpako me te tō mai i ngā kōrero i te paetukutuku ki tana tūtohi hura. Kātahi ka whakatikatika i te takoto o te kōrero, ka tautuhia ngā kupu hei huna, ka waihanga rārangi kupu matua me te nuku i ngā ahanoa waehere ki te huna i ngā kupu kua tautohua. Kei te mōhio ia kia pāwhiritia te ahanoa huna waehere ka hunaia te ahanoa ka puta kē ko te kupu huna, te whakautu tika hoki.

Mā te waihanga ngohe pānui kati, hei pāhekoheko matihiko e whakaatu ka taea e Reihana te:

  • whakamahi i te pūtirotiro tukutuku, i tētahi momo pūrere rapu rānei
  • pato kia kotahi, kia rua rānei ngā kupu matua e hāngai ana ki tōna kaupapa (kōrero rapu)
  • rapu i te rārangi whārangi ipurangi ki te kimi pārongo
  • tiki kōrero i te ipurangi, me tōna mārama pai ki ngā take mana whakairo hinengaro, manatā hoki.
Ngā momo tikanga

Kua kōrerotia e ngā ākonga ngā ara hei rapu i ngā momo kōrero i runga ipurangi.

 

I tikiake mai i http://technology.tki.org.nz Ko te ActiveInspire he mea waitohu nā Promethean World, ehara i te mea he tautoko, he whakamana, e whakaae ana rānei rātou ki tēnei pae. Mana tārua © Te Tāhuhu o te Mātauranga 2018, engari anō ngā atahanga ActiveInspire. Kāore tēnei papatono e tautokotia ana e te Tāhuhu o te Mātauranga.