Kati
He whakaaturanga matihiko

He whakaaturanga matihiko

Tūmahi

Whāinga

Ka tūhura, ka whakamahi, ka whakaatu, ka whakaputa i ngā nekehanga i roto i ngā horopaki huhua.

  • ka aro ki ētahi pūmanawa me te pūtake o aua pūmanawa
  • ka tiki atu i ngā pikitia kua pupuritia ki tōna pūrere
  • ka waihanga i tētahi whakaaturanga matihiko poto mā te whakamahi i te taupānga Explain Everything kātahi ka hopu ki te pūrere
  • ka tuari i te whakaaturanga me tō kaiako, mā te tuku īmēra atu.
Putanga ako
Ka taea e te ākonga
  • matapaki i ngā momo taupānga kua whakamahia e rātou, ā, i pēhea hoki tā rātou whakamahi i ngā taupānga rā
  • ako i ngā mahi e pā ana ki te rokiroki i tētahi kōnae/ kōrero ki tētahi pūrere
  • waihanga i tētahi whakaaturanga matihiko poto mā te whakamahi i te taupānga Explain Everything.
Paearu angitu
Ka angitu te ākonga mēnā ka taea e ia
  • te tautohu ko tēhea taupānga papahiko te mea tika hei whakamahi māna
  • te waihanga whakaaturanga matihiko mā te whakamahi atahanga me tētahi hopu reo
  • te rokiroki i te whakaaturanga matihiko ki te papahiko, ka tono īmēra atu ki te kaiako.
He Tauira Ngohe

Waihangatia he whakaaturanga mā te taupānga Explain Everything ki te whakamōhio atu i ngā kānapanapa, ngā mahi ā-ringa, ngā nekehanga ā-tinana, ā-waewae mō tētahi waiata ā-ringa, haka rānei.

Te Ngohe

Ka tonoa ngā ākonga ki te waihanga whakaaturanga matihiko o tā rātou ake pepeha mā te whakamahi i te taupānga Explain Everything. He atahanga tā rātou kua tiakina kētia ki te pūrere ka whakamahia e rātou. Ka huaki ngā ākonga i te taupānga, ka huaki i tētahi whārangi hou. Ka whakamahi rātou i te tāpiri atahanga ki te tiki me te waiho atahanga ki te mata o te pūrere. Ka whakamahi i ō rātou matimati ki te whakarahi me te whakaiti i te atahanga ki te rahi e hiahiatia ana. I a ia e taki ana i tana pepeha ka hopu te ākonga i tōna reo mā te whakamahi i te pū hopu reo i te taupānga. Ka arotake ā-taringa rātou i te hopunga reo, ā, kua wātea rātou ki te hopu anō i te reo ina hiahiatia ana. Kia oti i a rātou te whakatau he pai te hopunga reo, ka arotakengia e rātou mā te purei i te hopunga katoa. Kātahi ka whakaingoa, ka tiaki rātou i te kōnae ki tā rātou pūrere, ka tuarihia ki te kaiako mā te īmēra.

Ngā whakaritenga

I mua i te tīmatanga. Tuhia ngā whāinga me ngā paearu angitu ki te papa i mua i te tīmatanga o te akoranga.

Tīmatanga

Kōrerotia ngā whāinga, ā, ka matapaki ai i te tūmahi. Pānuihia ngā paearu angitu.

Matapakihia ēnei:

He aha ngā taupānga e mōhiotia ana, kua whakamahia rānei? He aha ngā mahi ka oti i ngā taupānga nei?

Waenganui
Kēmu – He Whakataetae

Me mahi takitahi te ākonga, ka whakamahi i ā rātou ake papahiko. Ko te ākonga tuatahi ki te whakaoti i ngā mahi nei ka whiwhi i te 100 piro mō tōna kāhui manu. Ka tīmata ia tūmahi mai i te mata pango. Tuhia ngā pātai e whai ake nei ki te papamā, ka whakaatu i ia o ngā pātai nei, me kōrero ā-waha rānei.

  • Me pēhea taku hopu whakaahua ka rokiroki ki taku papahiko?
  • Me pēhea taku hopu kiriāhua ka rokiroki ki taku papahiko?
  • Me pēhea taku titiro ki ngā whakaahua kei taku papahiko?
  • Me pēhea taku waihanga kōwaiwai toirau?
  • Me pēhea taku hopu ataata?
  • Me pēhea taku mātakitaki anō i tētahi ataata kei taku papahiko?
  • Me pēhea taku whakarongo ki ngā puoro?
  • Me pēhea taku mātakitaki puoro ataata?
  • Me pēhea taku rapu mōhiohio mō tētahi kaupapa e whai nei au?
  • Me pēhea taku rapu, me taku tango i ngā taupānga hou?
  • Me pēhea taku tuari mōhiohio mai i taku papahiko ki tā tētahi noa atu?
Waihangatia he Whakaaturanga Matihiko

Me hono i tētahi papahiko ki te Pouaka Whakaata Atamai, ki tētahi pūwhiti/pūrere kiriata. Mā te kaiako e whakatauira atu ngā mahi ki te akomanga mō te hanga whakaaturanga matihiko mai i ngā whakaahua kei tō papahiko me te whakamahi i te taupānga Explain Everything. Oti ana me īmēra atu ō mahi ki te kaiako. Me whakaatu atu i ngā tohutohu kia pai ai te kite a ngā ākonga (ki te papamā, mā runga pepa rānei ka tāpiritia ki te pakitara, ki runga rānei i ngā pūrere matihiko).

Me whakamārama atu ki ngā ākonga ko ā rātou mahi, he:

  • waihanga i tētahi whakaaturanga matihiko mō tō rātou pepeha
  • whakamahi i te taupānga Explain Everything
  • whakamahi i tētahi, ētahi whakaahua rānei
  • whakamahi i tētahi hopu reo i hangaia mai i tēnei taupānga
  • tiaki i te whakaaturanga ki tō pūrere
  • tuari i tō whakaaturanga me tō hoa
  • tuku ā-īmēra atu i tō whakaaturanga ki tō kaiako.
Whakaotinga

Hoki atu ā-rōpū ki te whakawhiti kōrero. Tirohia anō ngā whāinga me ngā paearu angitu. Tūmahi whakaputa: I mua i te haerenga o ngā ākonga tonoa rātou kia whakaatu i ā rātou mahi ki tētahi hoa.

He taunaki mahi

Ngā hononga ataata

Te Waihanga i tētahi Whakaaturanga Matihiko - Ākonga 1

Tā te ākonga

HMC1803 VUW 1K 1

Whakaahua 1: Te huaki i te taupānga ‘Explain Everything’.

 

HMC1803 VUW 1K 2

Whakaahua 2: Te huaki i tētahi kaupapa hou.

 

HMC1803 VUW 1K 3

Whakaahua 3: Te tāpiri whakaahua ki te whakaaturanga.

 

HMC1803 VUW 1K 4

Whakaahua 4: Te whakatika i te whakaahua ki te rahi me te tauwāhi e hiahiatia ana.

 

HMC1803 VUW 1K 5

Whakaahua 5: Te waihanga hopukanga reo i roto anō i te taupānga.

 

HMC1803 VUW 1K 6

Whakaahua 6: Te whakaingoa me te tiaki i te kaupapa.

 

HMC1803 VUW 1K 7

Whakaahua 7: Te tīpako i te kōwhiringa tuari ā-īmēra.

 

HMC1803 VUW 1K 8

Whakaahua 8: Te tāuru i te wāhitau īmērā tika me te tuku atu ki tērā tangata.

 

He whakawhiti kōrero

Kaiako: Me pēhea te huri i tētahi whakaahua?

Ākonga: Me muku te mea tuatahi, arā me tāpiri tētahi anō

Kaiako: Me pēhea te huri i te hopunga kōrero?

Ākonga: Me pā a raro o te hopukanga, ka muku. Me hopu anō taku pepeha

Kaiako: Me pēhea te mātakitaki i tāu whakaaturanga?

Ākonga: Me huaki i Explain Everything, me huaki taku ataata, ka mātakitaki.

Rauemi
  • Papahiko – tūhonoa te pūrere matihiko ki te whatunga ahokore ka whakamahi i ēnei taupānga: Explain Everything, Īmēra, Raowao/Pūtirotiro tukutuku
  • Pouaka Whakaata Atamai he pūwhiti, he pūrere kiriata rānei
Aromatawai
  • tuari i tētahi whakaaturanga matihiko ā-īmēra ki te kaiako.
  • whakaatu i ā rātou mahi ki tētahi hoa, ki te kaiako, ki te akomanga rānei.
Hononga ki te Marautanga
Ngā Toi Whenu: Ngā Mahi a Rēhia Taumata: 3
Rerenga kōrero

Me pēhea taku hopu whakaahua?
How do I take a photo?

Me pēhea taku tiaki whakaahua ki taku pūrere matihiko?
How do I save a photo to my mobile device?

Me pēhea te rapu taupānga?
How do I search for apps?

Kaiako: How can you change a picture?

Ākonga: Delete the first one, and then add another one

Kaiako: How can you change the voice recording?

Ākonga: Touch the recording at the bottom, and delete it. Then record my pepeha again

Kaiako: How can you watch your presentation?

Ākonga: Open Explain Everything, open my video, and watch it.

 

'He whakawhiti ā-tuhi tēnei o tētahi kōrero tūturu.'

 

Me pēhea te tiki ake i te hopunga reo?
How do I retrieve the voice recording?

Me pēhea taku tuari ki te kaiako?
How do I share it with the teacher?

Ngā Kupu Hou / New Words
Kupu Māori
Kupu Pākehā

hopu reo

record voice

īmēra

email

rokiroki

store

kāmera

camera

mata

screen

pūrere

device

hopu whakaahua

take photos

tiki ake

retrieve

tuari

share

tuku īmēra

send email

waihanga

create

puku atahanga

Images drive

whakaaturanga

presentation